Inspektorati Qendror i Punës (IQP) është organ i pavarur i Administratës Shtetërore, i cili vepron në kuadër të Ministrisë për Punë Familje dhe Vlerat e Luftës Çlirimtare. IQP është i vetmi organ në kuadër të pushtetit ekzekutiv të Republikës së Kosovës i cili monitoron zbatimin e legjislacionit nga fusha e marrëdhënieve të punës, si dhe sigurisë dhe shëndetit në punë.

Baza ligjore për themelimin dhe funksionimin e IQP është përcaktuar me:

• Ligjin nr. 2002/9 mbi Inspektoratin e Punës në Kosovë;
• Ligjin Nr. 03/L-017 për Ndryshimin dhe Plotësimin e Ligjit për Inspektoratin e Punës 2002/9;
• Rregulloren Nr. 15/2015 për Organizimin e Brendshëm dhe Sistematizimin e Vendeve të Punës në IQP.

IQP udhëhiqet nga Drejtori Ekzekutiv i Inspektoratit Qendror të Punës, i cili për punën e tij dhe të institucionit që udhëheq raporton drejtpërdrejt Ministrit të MFPT-së.

Inspektorati Qendror i Punës mbikëqyr zbatimin e:

• Ligjit të Punës Nr. 03/L-212,
• Ligjit Nr. 04/L-161 për Sigurinë dhe Shëndetin në Punë.

Gjithashtu, IQP mbikëqyr edhe zbatimin e disa dispozitave të ligjeve të tjera si:

• Ligji nr. 04/L-156 për kontrollin e duhanit;
• Ligji nr. 04/L-219 për të huajt;
• Ligji nr. 03/L-200 për grevat;
• Ligji nr. 03/L-019 për aftësimin, riaftësimin profesional dhe punësimin e personave me aftësi të kufizuara;
• Ligji Nr. 02/L-81 për nxitjen dhe mbrojtjen e të ushqyerit me qumësht gjiri.

IQP mbikëqyr gjithashtu edhe zbatueshmërinë e akteve nënligjore që dalin nga këto ligje dhe që lidhen me marrëdhënien e punës, si dhe sigurinë dhe shëndetin në punë.

Përcaktimi dhe shqiptimi i gjobave për shkeljen e dispozitave të Ligjit të Punës bëhet sipas Udhëzimit Administrativ Nr. 01/2011 për përcaktimin dhe shqiptimin e gjobave për shkeljen e dispozitave të Ligjit të Punës, ndërsa ligjet tjera kanë shumat e përcaktuara varësisht nga ligji përkatës.